Лаки аз “Matiz”героин ёфт

Душанбе, 09.06.2014. (АМИТ «Ховар», Мавҷуда Анварӣ). -Шабонарӯзи гузашта кормандони Агентии назорати маводи нашъаовари назди Президенти Ҷумҳурии Тоҷикистон як нафар паҳнкунандаи маводи нашъаоварро дастгир намуданд.
Ҳангоми гузаронидани амалиёт дар назди Корхонаи гӯшти ҷумҳурӣ бо гумони даст доштан дар муомилоти ғайриқонунии маводи нашъаовар сокини 30-солаи ноҳияи Рӯдакӣ боздошт гардид, ки аз кисаи шимаш пакетҳои героиндор дарёфт гардиданд.
Баъдан кормандони Агентӣ мошини шахсии тамғаи “Matiz ”-ро, ки ба боздоштшуда тааллуқ дошт, бо истифода аз саги хизматӣ бо лақаби Лаки кофтуков намуданд. Дар дохили мошини мазкур махфигоҳ бо героин ошкор шуд. Тавре тафтишоти пешакӣ нишон дод, боздоштгардида героинро дар пакетҳо бо вояи яккарата тайёр карда, бо фурӯши яклухт мегузошт.
Аз рӯи ҳодисаи мазкур парвандаи ҷиноӣ оғоз гардида, тафтишот идома дорад.