Мақоми нави М.Ҳақдодов

Душанбе, 30.06.2014.(АМИТ «Ховар», Марзия Саидзода).- Бо пешниҳоди Президенти Ҷумҳурии Тоҷикистон Эмомалӣ Раҳмон раиси Комиссияи экологии Маҷлиси намояндагони Маҷлиси Олии ҷумҳурӣ Маҳмадшариф Ҳақдодов-муовини котиби генералии Созмони ҳамкории Шанхай таъин гардид. Дар робита ба ин, дар ҷаласаи навбатии иҷлосияи панҷуим палатаи поёнии Парлумони Тоҷикистон ваколати вакили Маҷлиси намояндагон Маҳмадшариф Ҳақдодов пеш аз муҳлат қатъ гардида, аз ҳайати Кумитаи Маҷлиси намояндагон оид ба масъалаҳои аграрӣ, захираҳои об ва замин бароварда шуд. Ҳамзамон бо Қарори Маҷлиси намояндагон М. Ҳақдодов аз вазифаи раиси Комиссияи экологии Маҷлиси намояндагон озод карда шуда, аз ҳайати Шӯрои палатаи поёнии Парлумони мамлакат хориҷ гардид.  Шукурҷон Зуҳуров -раиси Маҷлиси намояндагон дар ин росто гуфт, ки Маҳмадшариф Ҳақдодов тӯли фаъолияташ дар Парлумони кишвар аз худ масъулиятшиносию кордонӣ нишон дода, рисолати вакилии худро иҷро намуд. Дар робита, Шукурҷон Зуҳуров ба М. Ҳақдодов бобати саҳми муносибаш дар рушди парламентаризм, масоили марбут ба экология ва равобити хориҷии Маҷлиси намояндагон «Ифтихорнома»-и Маҷлиси намояндагонро супорид.