Маҳфили адабӣ ба хотираи неки Фотеҳ Ниёзӣ
Душанбе, 6.06.2014. (АМИТ «Ховар», Зарангези Латиф).- Дирӯз дар Иттифоқи нависандагони Тоҷикистон маҳфили адабӣ ба хотири адиби тоҷик Фотеҳ Ниёзӣ баргузор шуд. Дар он шоирону нависандагон ва аҳли илму адаб аз кишварҳои ҳамсарҳад ширкат варзиданд.
Тавре ки зикр шуд, Фотеҳ Ниёзӣ яке аз донишмандони барҷастаи адабиёти тоҷик буда, дар солҳои 30-юми садаи гузашта ба майдони адабиёти тоҷик ворид шуда, аз худ мероси арзишмандеро ба мерос гузоштааст.
Бо ёдоварӣ аз осори гаронбаҳои адиби зиндаёд гуфта шуд, ки баробари офаридани асарҳои бадеӣ Ниёзӣ ҷангноманавис низ буда, доир ба воқеоти солҳои 40-ум низ як силсила асарҳоро ба иншо расонидааст, зеро худи нависанда иштирокдори Ҷанги дуюми ҷаҳонӣ буд.
«Ҳар беша гумон мабар, ки холист» ҳамон офаридаест, ки мақбули хонандагони зиёде гардидааст. Асари «Сарбозони бесилоҳ» ҳаёти мардумони ақибгоҳро, ки дар таъмини ғалаба саҳми арзанда гузоштаанд, инъикос намудааст.
Ёдрас мекунем ,ки Фотеҳ Ниёзӣ ҳамчунин муаллифи яке аз романҳои гаронарзиши адабиёти тоҷик «Вафо»-мебошад, ки он аслан ишқӣ -бадеӣ буда, аз паҳлӯҳои гуногуни рӯзгори даврии мардум қисса мекунад. Нақши Фотеҳ Ниёзӣ дар адабиёти тоҷик назаррас унвон шуда, аҳли адаб то ба имрӯз ҳам чароғи хотираи ӯро равшан нигоҳ медоранд. Имрӯзҳо, ки аз рӯзгори ин қаламбадасти адабиёти тоҷик расо сад сол сипарӣ мегардад, аҳли адаб бо қиссаҳои ширин замони фаъолияту эҷодиёти Фотеҳ Ниёзиро ба хотир меоранд.