Муҳокимаи сатҳи муошират бо забони адабӣ дар нақлиёт

Душанбе, 05.06.2014. (АМИТ «Ховар», Мавҷуда Анварӣ). — Кумитаи забон ва истилоҳоти назди Ҳукумати Ҷумҳурии Тоҷикистон пагоҳ баъди зуҳр дар Донишкадаи исломии Тоҷикистон ба номи Имоми Аъзам Абӯҳанифа оид ба татбиқи Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон»  бо донишҷӯёну омӯзгорон мулоқот доир менамояд. 
Бо мақсади арҷгузорӣ ба забони давлатӣ ва иҷрои талаботи «Барномаи рушди забони давлатӣ барои солҳои 2012-2016» кумита як зумра мулоқотҳоро бо иштироки омӯзгорону донишҷӯёни Донишгоҳи миллии Тоҷикистон, Донишгоҳи давлатии омӯзгории Тоҷикистон, Донишгоҳи славянии Тоҷикистону Русия, Донишгоҳи давлатии тиббии Тоҷикистон, Донишгоҳи техникии Тоҷикистон ва Донишгоҳи аграрии Тоҷикистон баргузор намуд.
Ҳангоми мулоқотҳо аз ҷониби омӯзгорону донишҷӯён дар иртибот ба масъалаҳои меъёрҳои қоидаҳои имлои забони тоҷикӣ, забони тарҷумаи китобҳои дарсӣ ва воситаҳои ахбори омма, забони иттилоот ва реклама, сатҳи муоишират бо забони адабӣ дар нақлиёт ва ҷойҳои ҷамъиятӣ, сатҳи барномаҳои телевизионӣ ва филмҳои бадеию тасвирӣ, сатҳи суханварии омӯзгорон дар муассисаҳои илмию таълимӣ, омӯзиши забонҳои хориҷӣ  ва тарбияи мутахассисони ҷавони забондон, риояи меъёрҳои қоидаҳои имлои забони тоҷикӣ дар воситаҳои ахбори омма саволҳо пешниҳод гардиданд, ки аз ҷониби роҳбарони сохторҳои кумита ба онҳо ҷавобҳои мушаххас дода шуданд.