Мулоқоти донишҷӯён бо асосгузори таълими ҳамгиро

Душанбе, 11.06.2014. (АМИТ «Ховар», Раъно Нусратуллозода).-Дирӯз дар Донишгоҳи давлатии Хуҷанд ба номи академик Бобоҷон Ғафуров мулоқоти донишҷӯён ва устодони факултаи педагогӣ бо олими маъруфи тоҷик, асосгузори таълими ҳамгиро дар Тоҷикистон, доктори илмҳои педагогӣ, профессор, академики Академияи таҳсилоти Тоҷикистон Файзулло Шарифзода баргузор гардид. Тавре декани факултаи педагогӣ Сабоҳат Абдулфайзова ба АМИТ «Ховар» иттилоъ дод, дар суҳбат аз тарафи академик Ф. Шарифзода асосан муаммоҳои соҳаи мактаб ва маорифи кишвар, аз ҷумла сабабҳои рӯй овардани маорифи кишвар ба таълими ҳамгиро, мушкилоти солҳои аввали гузаштан ба таълими ҳамгиро, омӯзиш ва истифодаи таҷрибаи пешқадами мамолики пешрафта оид ба таълими ҳамгиро, таълифи китобҳои таълимӣ мутобиқ ба талаботи таълими ҳамгиро, сифат ва муҳтавои китобҳои нави дарсӣ барои талабагони синфҳои ибтидоӣ, мақом ва шахсияти омӯзгор дар ҷомеа, баъзе роҳҳои беҳтар намудани сифати таълим ва тарбия дар мактабҳои таҳсилоти умумии кишвар, омодагии омӯзгорони ояндаи синфҳои ибтидоӣ ба фаъолияти таълимӣ ва ворид шудани онҳо ба талаботи таълими ҳамгиро ва ғайра мавриди таҳлил ва натиҷабардорӣ қарор дода шуд.Дар мулоқот омӯзгорони ояндаи синфҳои ибтидоӣ аз академик Файзулло Шарифзода масоили вобаста ба суст будани нутқи адабии омӯзгорон, зиёд шудани ахбороти илмӣ ва теъдоди фанҳои таълимӣ дар синфҳои ибтидоӣ, мавҷуд будани парокандагии донишҳо ва нафаҳмидани яклухтии олам аз тарафи хурдсолон, коҳиш ёфтани қобилияти фикрронӣ ва инкишофи нутқи талабагони хурдсол, дар мадди аввал гузоштани инкишофи фикрронии талабагони синфҳои ибтидоӣ, мақоми омӯзгор дар ҷодаи омода намудани шогирдони қобилияти фикрронӣ дошта, дорои ҷаҳонбинии илмӣ, ҷавонони худогоҳу ватандӯст, хештаншиносу таҳаммулпазир, ба талаботи бозори меҳнат ва навгониҳои илму техника омода будани насли наврас, талабот ба дарси муосир ва ғайраҳоро матраҳ намуда, ҷавоби амиқу дақиқ дарёфтанд.Мавриди зикр аст, ки ҳамкории факултаи педагогии Донишгоҳи давлатии Хуҷанд ба номи академик Бобоҷон Ғафуров бо марказҳои бонуфузи илмии пойтахти кишвар мунтазам густариш ёфта, яке аз чунин марказҳои пазируфтагардидаи илмӣ ин Академияи таҳсилот Тоҷикистон мебошад, ки факултаи педагогӣ бо ҳамаи сохторҳои он ҳамкории серсоҳа ва фарохро ба роҳ мондааст. Ҳамасола қисми муайяни омӯзгорони ҷавони факулта дар назди олимони барӯманди Академияи таҳсилоти Тоҷикистон такмили ихтисос ва бозомӯзӣ намуда, атрофи проблемаҳои илмӣ пажуҳишҳои илмӣ-тадқиқотиро ба иҷро мерасонанд.