Мулоқоти Ш.Саид бо М.Муҳаммад
Душанбе, 30.06.2014. (АМИТ «Ховар», Кристина Эрлих). – Раиси ПСС Тоҷикистон Шариф Саид дар ҳошияи сафари давлатии Президенти Ҷумҳурии Тоҷикистон Эмомалӣ Раҳмон ба Малайзия охири ҳафтаи гузашта дар шаҳри Куала Лумпур бо вазири савдо ва саноати Малайзия Мустафо Муҳаммад мулоқот анҷом дод.Тавре ки аз дафтари матбуоти ПСС ҶТ ба АМИТ «Ховар» хабар доданд, мусоҳибон вазъу дурнамои ҳамкории тиҷоратию иқтисодии ҳар ду кишварро мавриди муҳокима қарор доданд.«Сафари давлатии Президенти Ҷумҳурии Тоҷикистон ва ҳайати тоҷирону соҳибкорони Тоҷикистон ба Малайзия ба рушди ҳамкории тиҷоратию иқтисодӣ ва фарҳангии кишварваҳоямон, бешубҳа, мусоидат хоҳад кард», — гуфт Мустафо Муҳаммад. Раиси Палатаи савдо ва саноати Тоҷикистон ба вазъи мусоиди сармоягузорӣ ба Тоҷикистон таваҷҷӯҳи хоса зоҳир намуда, иброз дошт, ки соҳибкорони Тоҷикистон ба ҳамкорӣ бо сохторҳои тиҷоратии Малайзия ва ҷалби сармояҳои хориҷӣ ба соҳаҳои афзалиятноки иқтисоди Тоҷикистон аҳамияти хоса зоҳир менамоянд. Шариф Саид ба Мустафо Муҳаммад пешниҳод намуд, ки масъалаи дар шаҳри Душанбе доир намудани намоишгоҳи молҳои саноатӣ, технологияҳои пешқадам ва таҷҳизоти Малайзия ва анҷумани соҳибкорони Тоҷикистону Малайзияро баррасӣ намояд.