Мулоқоти ваколатдор оид баҳуқуқи инсон бо Сафири Озарбойҷон

Душанбе, 12.06.2014. (АМИТ «Ховар», Марҳабои Азамат). – 11 июн дар шаҳри Душанбе мулоқоти ваколатдор оид баҳуқуқи инсони Ҷумҳурии Тоҷикистон Зариф Ализода бо Сафири Фавқулодда ва Мухтори Ҷумҳурии Озарбойҷон дар Ҷумҳурии Тоҷикистон Аббосалӣ Ҳасанов баргузор гардид. Тавре ки аз Сафорати Ҷумҳурии Озарбойҷон ба АМИТ «Ховар» хабар доданд, ҷонибҳо дар ҷараёни мулоқот рушди муносибатҳои байни мақомоти давлатии ҳар ду кишварро бо камоли қаноатмандӣ зикр карда, имкониятҳои ҳамкории мутақобилан муфид дар бахши ҳуқуқҳои инсонро қайд намуданд. Зариф Ализода ба мусоҳиб аз кори иҷрошуда дар ин бахш тайи панҷ соли гузашта ва нақшаҳои оянда хабар дод.Сафир Аббосалӣ Ҳасанов дар навбати худ дар бораи озодиҳои ҳуқуқҳои инсон дар Ҷумҳурии Озарбойҷон нақл кард. Мусоҳибон хусусиятҳои хоси ҳар ду кишварро ба назари эътибор гирифта, аҳамияти мубодилаи таҷриба ва ташкили сафари ҳайатҳо ба кишварҳои якдигарро қайд намуданд.Ҷонибҳо ҳамчунин перомуни ҷиҳатҳои мухталифи ҳуқуқӣ ва сиёсию психологии вайрон кардани ҳуқуқҳои инсон мубодилаи афкор намуданд.