Намоишгоҳи «ИнтерЛегПром-2014» дар Душанбе

 Душанбе, 03.06.2014. (АМИТ «Ховар», Мавҷуда Анварӣ). —  4-уми июни соли ҷорӣ дар шаҳри Душанбе кушодашавии расмии намоишгоҳ-ярмаркаи 8-уми махсуси байналмилалии «ИнтерЛегПром-2014» баргузор мегардад. 
Дар ин бора ба АМИТ «Ховар» аз маркази матбуоти Палатаи савдо ва саноати кишвар иттилоъ доданд.
Тибқи иттилои манбаъ, намоишгоҳ-ярмарка аз 4 то 8 июни соли ҷорӣ соати 10.00 дар Маҷмааи давлатии «Кохи Борбад» доир мешавад. Дар намоишгоҳ дар баробари маҳсулоти саноатии ватанӣ, инчунин маҳсулоти саноати сабуки истеҳсоли дигар давлатҳо низ пешкаши тамошобинон гардонида мешавад. 
Ташкили намоишгоҳ дар  Тоҷикистон санъати хеле ҷавон аст- ба ташкили он ҳамагӣ 10 сол пур шудааст. Вале ба ин нигоҳ накарда, дар муддати кӯтоҳ он дар харитаи намоишгоҳҳо на танҳо дар Осиёи Марказӣ, балки дар кишварҳои Русия, Чин, Кореяи Ҷанубӣ ва кишварҳои аврупоӣ ҷои намоёнро ишғол намудааст.