Псков барои таҳсил даъват мекунад

Душанбе, 12.06.2014. (АМИТ «Ховар», Екатерина Пасторова). – Донишкадаи молияю иқтисоди Тоҷикистон бо донишкадаҳои хориҷию Тоҷикистон дар бахши мубодилаи муаллимону донишҷӯён ва китобҳои методию таълимӣ зич ҳамкорӣ дорад, — гуфт зимни сӯҳбат бо хабарнигори АМИТ «Ховар» ректори донишкада Ашӯрбой Солиев. Мувофиқи суханони мавсуф, имрӯз яке аз донишкадаҳои ҷавонтарини олии кишвар бо 26 муассисаҳои таҳсилотии Иттиҳоди Аврупо, Федератсияи Русия, Украина, Қазоқистон ва Қирғизистон шартномаҳо бастааст. «Алҳол дар донишкада 4 лоиҳаи ройгонӣ дар амал татбиқ мегардад, ки дар ҳошияи онҳо харидории таҷҳизоти техникӣ ва китобҳои махсуси таълимӣ, таҷрибаомӯзии омӯзгорон, такмили раванди таълим ва ғайра дар назар аст», — гуфт Ашӯрбой Солиев. Мувофиқи суханони Ашӯрбой Солиев, Донишгоҳи давлатии шаҳри Псков барои таҳсили донишҷӯёни тоҷик ду ҷойи буҷетӣ ҷудо кардааст. Донишгоҳи мазкур омодааст, ки дар асоси тиҷоратӣ донишҷӯёни дигарро низ қабул намояд.