Роҳхати бештар ба Хатлон

Душанбе, 06.06.2014. (АМИТ «Ховар», Раъно Нусратуллозода).- Дар Донишгоҳи давлатии омӯзгории Тоҷикистон ба номи С.Айнӣ конфронси ҷумҳуриявӣ «Оид ба тақсимоти мутахассисони ҷавон дар соли хониши 2014-2015» доир шуд. Дар ҳамоиш ректори донишгоҳ А.Раҳмонов зикр кард, ки дар соли таҳсили ҷорӣ дар донишгоҳ аз рӯи 27 ихтисос  909 нафар донишҷӯ, аз ҷумла, 533 нафар аз тариқи буҷавӣ, 101 нафар тибқи квотаи Президентӣ ва 376 нафар аз тариқи шартнома хатм менамоянд. 
Тибқи роҳхати Вазорати маориф ва илми Ҷумҳурии Тоҷикистон аз 533 нафар хатмкунанда ба вилояти Хатлон 169 нафар, ба вилояти Суғд 52 нафар, ба вилояти Кӯҳистони Бадахшон 52 нафар, ба шаҳри Душанбе 102 ва ноҳияҳои тобеи ҷумҳурӣ 158 нафар сафарбар мешаванд. 
Бо зикри он ки шояд дар асоси созишномаи сеҷониба баъзеҳо дар донишгоҳ ҳамчун магистр таҳсили худро идома диҳанд, ректори донишгоҳ ба масъалаи ба ҳайси омӯзгори ҷавон ба кор рафтани донишҷӯёне. ки аз тариқи квота таҳсил намудаанд, дахл карда, гуфт: Ин нафарон тибқи роҳхате, ки доранд, ҳатман бояд ба маҳалҳои худ баргашта, аз рӯйи ихтисосашон кор кунанд. Бо эъломи он ки имсол дар донишгоҳ аввалин докторҳои ихтисосӣ қабул мешаванду инҳо магистрон хоҳанд буд, А.Раҳмонов гуфт, ки ҳарчанд нарасидани кадрҳо дар ҳама ноҳияҳо ҳаст, ин мушкил бештар дар вилояти Хатлон ба назар мерасад. Ба изҳори ӯ, имрӯз баръакс дар бисёре аз шаҳрҳои ВМКБ кадрҳо зиёданд, барои ҳамин донишҷӯён бештар бояд ба шаҳру навоҳии Хатлону Рашту Суғд ба кор сафарбар шаванд, ки он ҷо масъалаи хобгоҳ ҳам мушкил надорад.
Муовини сардори раёсати кадрҳо ва корҳои махсуси Вазорати маориф ва илми Тоҷикистон Зиёратшо Назруллоев изҳор дошт, ки агар чанд соле пеш нарасидани кадрҳо 13 ҳазор буд, ҳоло ин шумора 477 нафарро ташкил медиҳад, ки 45 нафар ба вилояти Хатлон дахл дорад. Аз мақомоти маҳаллӣ зиёда аз 3300 дархост расидааст, зиёда аз 4000 нафар кадр ҳамин соҳаро хатм мекунаду метавон гуфт, ки ин мушкил ҳалшаванда аст.