Шаҳри нав дар харитаи Суғд

Хуҷанд, 10.06.2014. (АМИТ «Ховар», Абдуаҳад  Шарифзода). – Солҳои наздиктарин  дар харитаи  ҷуғрофии   вилояти  Суғд  шаҳри  нав  пайдо  мешавад. Шаҳри  наве, ки дар маҳалли Сомғари ноҳияи  Бобоҷон  Ғафуров  бунёд  мегардад, ҳанӯз  унвон  надошта, номи  он дар ҷараёни  сафари Сарвари давлат Эмомалӣ  Раҳмон  баҳори  соли оянда  ба  Суғд  муайян  карда  мешавад. 
Рӯзи  ҷумъаи  гузашта бо  иштироки раиси вилояти  Суғд  Абдураҳмон  Қодирӣ   маросими  гузоштани  санги  аввал  ба  таҳкурсии  сохтмони  шаҳри  Нав  баргузор  гардид. Барои  эъмори шаҳр, ки дар он  бояд 40  ҳазор  нафар сокинони Сомғар  истиқомат намоянд, беш  аз 7  ҳазор  гектар  замин ҷудо  карда  мешавад. 
Раиси  вилоят якҷоя  бо  роҳбарону  мутахассисони муассисаҳои   сохтмонӣ,  заминсозӣ, умури  обёрӣ  ва  меъморони  шаҳри  Хуҷанд  бо  лоиҳаи шаҳри  нав  шинос  шуд. 
Чанде  пештар дар  ин  маҳал  бо  иштироки  мутахассисони   шаҳри  Екатеринбурги  Русия маросими пармакории чоҳи  аввал барои  таъмини  ин  маҳалла  бо  об оғоз  ёфт. 
Барои татбиқи лоиҳаи  аввали обтаъминкунӣ  60  миллион  сомонӣ   ва лоиҳаи дуюми  он  50  миллион  сомонӣ    сарф  мешавад.