Ширкатҳои ватанӣ дастгирӣ меёбанд

Душанбе, 4.06.2014. (АМИТ «Ховар», Манижа Баҳромзода).- Имрӯз дар шаҳри Душанбе бахшида ба Рӯзи касбии кормандони саноати сабуки Тоҷикистон Палатаи савдо ва саноати Ҷумҳурии Тоҷикистон бо дастгирии ҳукумати кишвар ва Вазорати саноат ва технологияҳои нав намоишгоҳи байналмилалии «ИнтерЛегПром-2014» -ро баргузор намуд. Дар намоишгоҳи мазкур 60 ширкати Тоҷикистон, 22 ширкати Ҷумҳурии Исломии Эрон ва ширкатҳои Афғонистон, Лаҳистон ва Туркия иштирок намуда, маҳсулоти худ, аз қабили маҳсулоти ниҳоии пахта, қолинбофии дастӣ, ҳунарҳои мардумӣ ва дигар таҷҳизоти муҳими корхонаҳои саноатиро ба намоиш гузоштанд. Аз Палатаи савдо ва саноати Тоҷикистон ба хабарнигори АМИТ «Ховар» иттилоъ доданд, ки ҳадаф аз ташкили намоишгоҳ кӯмак намудан ба ширкатҳои ватанӣ дар масъалаи ёфтани мавқеи худ дар бозор, шинос ва муаррифӣ намудани харидорони ватанӣ бо молу маҳсулоти ширкатҳои ватанӣ ва ёфтани шарикони ҳамкор мебошад. Ёдовар мешавем, ки намоишгоҳи байналмиллалии «ИнтерЛегПром-2014» 8-умин намоишгоҳ дар Тоҷикистон буда, аз 4 то 8- уми июн идома меёбад.