Судяи Ваҳдат боздошт гардид

Душанбе, 03.06.2014. (АМИТ «Ховар», Мавҷуда Анварӣ). — Агентии назорати давлатии молиявӣ ва мубориза бо коррупсияи Тоҷикистон алайҳи судяи суди ноҳияи Ваҳдат бо айби гирифтани пора парванда боз намудааст.Дафтари матбуоти Агентии зидди коррупсия бо тасдиқи ин хабар гуфт, ки бар асоси шикояти сокинони ноҳияи Ваҳдат, судяи суди ин ноҳия Мирмаҳмад Одинаев бо гирифтани пора дар ҳаҷми 4 ҳазор доллар боздошт шудааст. Судя Одинаев аз сокини ин ноҳия Умар Саидов барои ҳалли масъалаи судии ӯ дар ибтидо се ҳазор доллар талаб намуда, онро соҳиб мешавад ва сипас боз як ҳазор доллари дигар талаб мекунад. Бар асоси аризаи Умар Саидов судя ҳангоми гирифтани пора аз тарафи кормандони Агенти назорати давлатии молиявӣ ва мубориза бо коррупсия боздошт мешавад. Ҳоло нисбат ба Мирмаҳмад Одинаев бо моддаи 319 қисми 2, яъне «талаб намудан ва аз худ кардани пора дар ҳаҷми махсусан калон» парванда боз гардида, тафтишот идома дорад.