Таҷлили Рӯзи Русия дар ДМИТ

Душанбе, 10.06.2014.(АМИТ «Ховар», Раъно Нусратуллозода).-Имрӯз дар Донишкадаи молия ва иқтисоди Тоҷикистон (ДМИТ) бо дастгирии Сафорати Русия дар Тоҷикистон ва дар ҳамдастӣ бо Иттифоқи занони русиягии ҳамватанони Тоҷикистон бахшида ба Рӯзи истиқлолияти Русия, ки 12 июн  ҷашн гирифта мешавад, ҷамъомади бошукуҳ доир гардид. Дар он намояндагони Сафорати Федератсияи Русия дар Тоҷикистон, намояндагони ақаллиятҳои миллии маскуни Тоҷикистон, устодону донишҷӯёни донишкада иштирок намуданд.
Тавре котиби матбуоти донишкада Машҳура Абдуллоева ба АМИТ «Ховар» иттилоъ дод, дар ҷамъомад котиби сеюми Сафорати Федератсияи Русия дар Тоҷикистон Игор Ковалёв, ректори Донишкадаи молия ва иқтисоди Тоҷикистон Ашӯрбой Солиев сухан гуфта, дар бораи густариши равобити иқтисодиву фарҳангӣ ва илмиву таълимӣ байни Ҷумҳурии Тоҷикистон ва Федератсияи Русияро ёдрас шуда, ҳозиринро бо ин рӯз муборакбод намуданд.
Сипас, Сабоҳат Раҳимзода, номзади илмҳои таърих, раиси Иттифоқи занони русиягии ҳамватанони Тоҷикистон дар мавзӯи «Рӯзи Русия – ҷашни озодӣ ва ваҳдати комили русиягиҳо», номзади илмҳои педагогӣ, муовини ректор оид ба тарбияи ДМИТ Лутфия Эшонҷонова дар мавзӯи «Нақши кафедраи забонҳо дар таълим ва нигаҳдошти забони русӣ», Фирӯза Галиева, корманди Вазорати маориф ва илми Ҷумҳурии Тоҷикистон дар мавзӯи «Нақши хатмкунандагони мактабҳои олии русӣ дар таҳкими дӯстии халқҳои тоҷику рус», Людмила Дрозденко, устоди кафедраи забонҳои тоҷикиву русии донишкада дар мавзӯи «Рушди маънавӣ ва анъанаҳои халқи рус», Зарифа Гусаова, сарвари ҷамъияти осетинҳо «Иристон» дар мавзӯи «Дар ҷавонон тарбия намудани ҳисси ифтихор ва ватандӯстӣ» баромади пурмуҳтаво ва ҷолиб намуданд.
Дар қисми фарҳангии ин ҷамъомад донишҷӯёни Донишкадаи молия ва иқтисоди Тоҷикистон, Донишгоҳи славянию тоҷикии Русия, хонандагони мактабҳои таҳсилоти миёна бо қироати шеърҳои адибони рус ва иҷрои сурудҳои дилнишин баромади ҷолиб намуданд.
Мавриди зикр аст, ки 7 июн бахшида ба Рӯзи Русия байни ду дастаи донишкада — «Иқтисодчиён» ва «Молиячиён» викторина таҳти унвони «Донандаи беҳтарини таърихи Русия» доир гардид, ки дар он дастаи аввал «Иқтисодчиён» ғолиб дониста шуд. Дар ҷамъомад ин викторина ҷамъбаст гардида, ба ғолибону иштирокчиёни беҳтарини он диплом ва туҳфаҳои хотирмон супорида шуд.