Тараннуми ваҳдат дар ашъори Рудоба

Душанбе, 9.06.2014. (АМИТ “Ховар”, Зарангези Латиф).-Бахшида ба 17-умин солгарди Рӯзи Ваҳдати миллӣ дар толори Иттифоқи нависандагони Тоҷикистон бо ташаббуси Ҳаракати ҷамъиятии ваҳдати миллӣ ва эҳёи Тоҷикистон ва мусоидати ташкилоти адибони мамлакат маҳфили базми шеъру таронаи муовини раиси Шӯрои марказии Ҳаракати ҷамъиятии ваҳдати миллӣ ва эҳёи Тоҷикистон, шоира Рудобаи Мукаррам барпо гардид. 
Дар оғози маҳфил шоири мардумии Тоҷикистон Камол Насрулло сухан гуфт. Сипас муовини якуми раиси Ҳаракати ҷамъиятии ваҳдати миллӣ ва эҳёи кишвар, раиси кумитаи иҷроияи Ҳаракат Мирзошоҳрух Асрорӣ 
иброз дошт, ки Комиҷроияи Ҳаракат ба ифтихори ҷашни мубораки Ваҳдати миллӣ, ки баргузории он ба таърихи 27 июн рост меояд, силсилаи чорабиниҳоро доир карда истодааст. Ин маҳфили бошукӯҳ низ аз ҷумлаи ҳамон тадбирҳои идона аст. 
Рудобаи Мукаррам ба саҳнаи шеър ва шоҳроҳи сиёсат бо шарофати иқдоми Президенти кишвар Эмомалӣ Раҳмон омадааст. Зимни сафари корӣ ба Вилояти Мухтори Кӯҳистони Бадахшон чун гавҳаршиноси нуктасанҷ баъди қироати шеъри диловез ўро ба пойтахти кишвар раҳнамоӣ мекунад. 
Нависандаи маъруфи кишвар Меҳмон Бахтӣ, ки дар ташкилоти ҷамъиятии мазкур масъулият дорад, зикр намуд, ки воқеан ҳам бону Рудоба дар як мудати кӯтоҳ дар ҷодаи шеъру адаб сабзид ва китобҳояш ба дасти мухлисон расид. Ин бегуфтугӯ аз ҷасорати худи ӯ, аз омӯзиши пайвастааш сарчашма мегирад.
Бояд гуфт, ки Рудобаи Мукаррам узвияти Иттиҳодияи нависандагону журналистонро мушарраф гашта, барандаи ҷоизаи Кумитаи ҷавонони мамлакат мебошад.