Тасарруфи 100 ҳазор доллар аз мошин

Душанбе, 3.06.2014. (АМИТ «Ховар», Муқаддас Темурзода). — Ба шуъбаи ВКД дар шаҳри Истаравшан сокини ҳамин шаҳр Абдуғаффор Мирбақозода, соли таваллудаш 1991, ки ба ҳайси ронандаи таксӣ кор мекунад, муроҷиат намудааст, ки 31-уми май, тахминан соати 13.00-дақиқа, дар кӯчаи Шарифови шаҳри Истаравшан ҳангоми дар дохили мошини тамғаи “Opel — Astra” қарор доштанаш, шахсони номаълум ӯро боздошт намуда, ба рӯяш хокаи қаламфурро пошида, лату кӯб намуда, бо тариқи ошкоро мошинро аз ҷойи ҳодиса 800 метр дуртар ронда, аз дохилаш маблағи пулии 100 000 доллари амрикоиро тасарруф намуда, аз ҷойи ҳодиса ғайб задаанд.
Тавре ки маркази матбуоти ВКД ҶТ хабар медиҳад, зимни гузаронидани чорабиниҳои фаврӣ-ҷустуҷӯӣ кормандони милитсия бо гумони ҷинояти ғоратгарӣ шаҳрвандон Қаҳҳор Ҷалолов, соли таваллудаш 1985, пеш судшуда ва Шуҳрат Абдуазимов соли таваллудаш 1980, истиқоматкунандагони шаҳри номбурдаро дастгир карданд. Далели шайъӣ қисман гирифта шуда, нисбат ба ҳодисаи мазкур парвандаи ҷиноӣ оғоз гардида, тафтиш идома дорад.