Татбиқи лоиҳаи беҳсозии сатҳи зиндагӣ дар Хатлон

  Душанбе, 25.06.2014.(АМИТ «Ховар», Марзия Саидзода).-Созишномаи грантӣ байни Ҷумҳурии Тоҷикистон ва Фонди байналмилалии  рушди кишоварзӣ оид ба лоиҳаи  «Беҳсозии сатҳи зиндагӣ дар Хатлон»-ро 25 июн вакилони палатаи поёнии  Парлумони Тоҷикистон ба тасвиб расонданд. 
            Ҷамолиддин Нуралиев-муовини аввали вазири  молияи ҷумҳурӣ зимни тавзеҳи санади мазкур гуфт, ки  Созишномаи грантӣ байни Ҷумҳурии Тоҷикистон ва Фонди байналмилалии  рушди кишоварзӣ моҳи январи соли 2009 дар Рим- пойтахти Италия ба имзо расидааст. Ҳадафи он баланд бардоштани сатҳи  зиндагии аҳолӣ аз ҳисоби зиёд намудани  даромаднокии  соҳаи кишоварзӣ, яъне афзун намудани маҳсулоти кишоварзии хоҷагии деҳқонӣ ва корхонаҳои кишоварзист.  Лоиҳаи мазкур дар 250 деҳаи ноҳияҳои Муъминобод, Шӯрообод, Балҷувон, Темурмалик ва Данғара амалӣ   шуда,  18 ҳазору 750 хонаводаро дар бар мегирад. Татбиқи лоиҳа аз ҳисоби Фонди байналмилалии  рушди кишоварзӣ қаблан ба маблағи  12,3  миллион $  ҳамчун грант тасдиқ шуд ва дар таърихи моҳи июли соли  2013 тағйирот   ба лоиҳа ворид шуда, маблағи  грантии он ба 9,4 миллион $ баробар шуда, саҳми Ҳукумати Ҷумҳурии Тоҷикистон дар шакли озодкунӣ аз андозҳо ва боҷҳои гумрукӣ 550 ҳазор $-ро   ташкил медиҳад.  Муҳлати анҷоми лоиҳаи мазкур охири апрели соли 2015 муайян шудааст. Ҷиҳати татбиқи лоиҳаи мазкур муасссисаи давлатии Маркази чорводории  идораи чарогоҳҳо низ таъсис дода шудааст. Дар доираи ин лоиҳа  82 мақомоти худфаъолияти  ҷамъиятӣ, хариди техникаи кишоварзӣ- 71 адад трактори МТЗ-82 ва дигар таҷҳизоти кишоварзӣ, гузаронидаи хати неруи барқ, сохтмон ва барқарсозии қубурҳои оби нӯшокӣ, харидории таҷҳизоти лабораторӣ дар бахши рушди  чорводорӣ,  таъмиру сохтмони пулу роҳҳо амалӣ гардонида мешаванд.
      Ҷамолиддин Нуралиев афзуд, ки татбиқи лоиҳа  бевосита аз ҷониби Маркази  идораи лоиҳа ва гурӯҳҳои   муайншуда, иборат аз ҷамоатҳои маҳаллӣ  амалӣ мешавад. Дар мавриди татбиқи лоиҳаи мазкур 50% занон ба усулҳои идораи кишоварзӣ фаро гирифта мешаванд. 
           Маҳмадамин Ҳисориев -вакили Маҷлиси намояндагон бар он назар аст, ки татбиқи лоиҳаи мазкур ба омода намудани мутахассисон дар бахши чорводорӣ ва кишоварзӣ, самаранок истифода бурдани  ҳар як ваҷаб қитъаи замин,  баланд бардоштани  сатҳи зиндагии мардум,  мусоидат ба рушди  устувори захираҳои замин, ташаккули  инфрасохтори истеҳсолии деҳот, баланд бардоштани самаранокии  кишоварзӣ ва паст гардонидани  сатҳи камбизоатӣ дар кишвар нақши муҳим  мебозад.