Татбиқи Стратегиям миллии муҳоҷирати меҳнатӣ

Душанбе,2.06.2014. (АМИТ «Ховар», Лайло Тоирӣ).- Ҳафтаи гузашта таҳти раёсати муовини раиси вилояти Суғд Анвар Яъқубӣ бо иштироки муовинони раисони шаҳру ноҳияҳо-сарпарастони соҳаи муҳоҷират, шуъбаю раёсатҳои Агентии шуғли аҳолӣ, ширкатҳои бо ҷалби қувваи кории хориҷӣ фаъолиятбаранда, субъектҳои хоҷагидор, намояндагони мақомоти ҳифзи ҳуқуқ ва воситаҳои ахбори омма ҷаласаи машваратӣ доир гардид, ки дар он вазъи татбиқи «Стратегияи миллии муҳоҷирати меҳнатии шаҳрвандони Ҷумҳурии Тоҷикистон ба хориҷа барои солҳои 2011-2015» баррасӣ гардид. Тавре ки аз Раёсати ХМ дар вилояти Суғд иттилоъ доданд, оид ба ҷараёни татбиқи «Стратегияи миллии муҳоҷирати меҳнатии шаҳрвандони Ҷумҳурии Тоҷикистон ба хориҷа барои солҳои 2011-2015» Сардори Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд Зайнура Шарифова ҳисоботи муфассал дод.Муовини раиси вилоят масъалаи муҳоҷирати меҳнатӣ, сафарбаркунию бо кор таъмин намудани муҳоҷирони меҳнатӣ дар хориҷа, ҳамкорӣ бо ҷамъиятҳои тоҷикон ва ҳамватанони бурунмарзӣ, пурсишҳои ҳавлигӣ , корҳои фаҳмондадиҳӣ дар байни аҳолӣ ва масъалаҳои марбут ба муҳоҷирати меҳнатиро бо шахсони масъул баррасӣ намуд. Аз ҷумла, роҳбарияти Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд ҷиҳати ташкили мизи мудаввар вобаста ба фаъолияти субъектҳои хоҷагидор ва таҳияи нақшаи чорабиниҳои нав дар самти татбиқи стратегия вазифадор карда шуд.