Ваҳдат-омили пешравии маориф

Душанбе,12.06.2014. (АМИТ «Ховар», Раъно Нусратуллозода).- Бахшида ба 17 – умин солгарди Ваҳдати миллӣ имрӯз дар Осорхонаи Академияи таҳсилоти Тоҷикистон мизи мудаввар баргузор гардид.Тавре ходими калони илми осорхонаи мазкур Сурайё Ҳомидова ба хабарнигори АМИТ «Ховар» иттилоъ дод, дар мизи мудаввар олимони Академияи таҳсилоти Тоҷикистон, ходимони илмии Пажуҳишгоҳи рушди маориф, мутахассисони соҳаҳои гуногун аз Маркази таҳсилоти иловагии назди Вазорати маориф ва илм иштирок намуданд. Маърӯзаҳои ходимони калони илми осорхона Қурбоналӣ Гадоев дар мавзӯи «Ваҳдат-омили пешравии маориф» ва Сураё Ҳомидова дар мавзӯи «Сулҳу ваҳдат- пойдевори ҳастии миллат» шунида шуд. Дар ҷамъомад зикр гардид, ки таҳкими ваҳдат ва ягонагии мардум дар ҳама давру замон рушди давлатдорӣ, инкишофи илму маърифат ва расидан ба ҳадафҳои олии миллиро дар ҷомеа таъмин месозад.