381 863 сомонӣ ҷарима кард ба маҳсулоти ғайристандартӣ

Душанбе, 11.07.2014. (НИАТ «Ховар»,Фарзона Достонзода).- «Дар шаш моҳи соли ҷорӣ дар маҷмӯъ, барои риоя накардани меъёри стандартҳо, истифодаи воситаҳои ченаки корношоям, вориду фурӯши маҳсулоти ғайристандартӣ дар 1542 ҳолат шахсони ҳуқуқӣ ва воқеӣ ба маблағи 381 863 сомонӣ ҷарима баста шуда, ин маблағҳо ба буҷаи давлат ирсол гардидаанд» иброз дошт зимни нишасти матбуотӣ директори Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон Шукурзода Бахтиёр .
Аз ҷумла, 61 тонна қиммаи гӯшти мурғ дар анбори нигоҳдории маҳсулот воқеъ дар шаҳри Душанбе ошкор ва пас аз ташхис тибқи хулосаи комиссия ба сифати хўроки чорво равон карда шуд. Инчунин, дар анбори нигоҳдории маҳсулоти ҶДММ “Кристал казбеги” ба миқдори 4456 кг чойи хушк, дар анборхонаи ҶДММ “Соса Соlа-нӯшокиҳои Тоҷикистон”, ки дар минтақаи саноатии ш.Хуҷанд ҷойгир мебошанд, ба миқдори умумии 138 828 адад нушокиҳои ташнашикан бо тамғаи “Фанта”, “Фанта-Лимонад” ва “Соса Соlа” муҳлати истеъмолиашон гузашта, ҳамзамон, 570 кг маҳсулоти қаннодӣ, 3000 кг майонез, 250 кг маҳсулотҳои қаннодии кӯдаконаи истеҳсоли Ҷумҳурии Халқии Хитой низ аз муомилот гирифта шуда, нисбати онҳо тибқи тартиби муқарраргардида чораҳо андешида шуд.