571 миллион сомонӣ қарзҳои хурд ба ноҳияҳои дурдаст

Душанбе, 22.07.2014. (АМИТ «Ховар», Раъно Нусратуллозода).-«Ҳаҷми қарзҳои додашуда дар нимсолаи аввали соли ҷорӣ 5,3 миллиард сомониро ташкил намуда, нисбат ба нимсолаи якуми соли гузашта 26 фоиз зиёд гардидааст»,-гуфт зимни нишасти матбуотӣ раиси Бонки миллии Тоҷикистон Абдуҷаббор Ширинов. Муҳлати миёнаи қарзҳо барои шахсони воқеӣ 418 рӯз ва барои шахсони ҳуқуқӣ 366 рӯз мебошад. Дар ин давра ҳаҷми қарзҳои хурди додашуда дар муқоиса ба ҳамин давраи соли гузашта наздики 3 миллиард сомониро ташкил намуд. Аз он ҷумла, ба ноҳияҳои дурдасти кӯҳистон 571 миллион сомонӣ қарзҳои хурд дода шудаанд, ки нисбат ба ҳамин давраи соли гузашта 28,4 фоиз зиёд аст, гуфта шуд зимни нишасти хабарӣ.