Боздиди мактаббачагони ВМКБ аз пойтахт

Душанбе, 29.07.2014 (АМИТ “Ховар”, Фарзонаи Давлат).- Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо мақсади ҳавасмандгардонии наврасону ҷавонон дар айёми таътили тобистона барои беш аз 200 нафар мактаббачагони ВМКБ лагерҳои таълимию фароғатӣ ташкил кардааст, ки дар ҷараёни истироҳат онҳо ҳамчунин аз ҷойҳои таърихии Душанбе дидан хоҳанд кард. Дар ин робита гурӯҳи навбатии 30 нафараи мактаббачагони ВМКБ, ки дар лагири Чайка”-и Вазоб истироҳат доштанд, аз Осорнхона ва Китобхонаи миллӣ ва ҳамзамон аз Маркази Исмоилияи пойтахт дидан намуданд,ки ин иқдом дар мафкураи онҳо ҳисси ватандустӣ ва арзишҳои миллиро боло мебардорад.Тавре дар ин бора аз Кумитаи мазкур хабар доданд, мактаббачагони ВМКБ ба ноҳияҳои Варзоб ва Шаҳринав оварда шуда, дар лагерҳои фароғатии “Чайка”, “Обшорон”, “Орбита” ва “Қаратоғ” ба фароғат ҷалб карда шудаанд, ки то ин замон ду гурӯҳи мактаббачоагон аз ҷойҳои таърихии пойтахт дидан намудаанд. Ёдрас мешавем, ки чунин иқдом аз ҷониби Кумитаи ҷавонон, варзиш ва сайёҳӣ ҳамасола барои мактаббачагони шаҳру ноҳияҳои кишвар ташкил карда мешавад.