Боздошти 49 нафар аъзои ташкилоти террористиву экстреместӣ
Душанбе, 18.07.2014. (АМИТ «Ховар», Муқаддас Темурзода).- «Дар давраи ҳисоботӣ аз ҷониби кормандони милитсия 49 нафар аъзои ташкилоти террористиву экстреместӣ, 39 нафар аъзои гурӯҳҳои мусаллаҳи ғайриқонунӣ ва 9 нафар аъзои гурӯҳҳои бандитӣ дастгир шуданд, ки аз тарафи онҳо 169 ҷиноят содир гардидааст», — изҳор дошт Вазири корҳои дохилӣ Раҳимзода Рамазон Ҳамро имрӯз дар нишасти матбуотӣ.Аз рӯйи суханҳои вазир бармеояд, ки дар ин давра кормадони милитсия 5 ҳолати амали террористиро пешгирӣ намуда, як ҷинояти террористиро ошкор кардаанд. Дар ҷавоб ба саволи хабарнигорон сардори Раёсати мубориза бо ҷиноятҳои муташаккили ВКД ҶТ Сафиалло Девонаев иброз дошт, ки бо ҷурми кӯшиши тарконидани заводи алюмини ТАЛКО, бинои прокуратура, ШКД, ҳукумат ва хонаи фарҳанги шаҳри Турсунзода 7 нафар боздошт гардид. Ба ҷавоби Сафиалло Девонаев Вазири корҳои дохилӣ илова намуд, ки ин нафарон шаҳрвандони Тоҷикистон буда, аъзоёни як гурӯҳи террористӣ мебошанд.