Бозгашти Соҳиб ба дастаи «Истиқлол»

Душанбе, 10.07.2014. (АМИТ «Ховар» Ситораи Боймурод).- Соҳиб Сувонқулов ҳимоятгари 26-солаи дастаи мунтахаби Тоҷикистон эҳтимол фаъолияти футболбозиашро дар дастаи «Истиқлол»-и пойтахт идома диҳад. Тавре дар ин бора сомонаи Федератсияи футболи кишвар хабар додааст, Сувонқулов қаблан дар дастаи номбурда ҳунарнамоӣ карда, ду дафъа соҳиби медали тиллои Чемпионати Тоҷикистон гардидааст. Соли гузашта ӯ ба дастаи «Реван»-и Озарбойҷон гузашт ва дар нимсоли охир бо сабаби беморӣ натавонист, ки ба футбол машғул шавад. Ҳоло бошад ӯ дар дастаи «Истиқлол» барои марҳилаи дуюми чемпионат омодагӣ мебинад.