Иштироки ҳайати Тоҷикистон дар Рӯзҳои амниятии САҲА

Душанбе, 10.07.2014 (АМИТ «Ховар»).- Дар Вена 8 июл Рӯзҳои амниятии Созмони Амният ва Ҳамкорӣ дар Аврупо таҳти унвони “Тавсеаи амният тавассути дипломатияи об: нақши САҲА” баргузор гардид, ки дар он ҳайати Ҷумҳурии Тоҷикистон бо роҳбарии Муовини вазири корҳои хориҷӣ Парвиз Давлатзода ширкат варзид.Дар маросими ифтитоҳии чорабинии мазкур Дабири Кулли САҲА Ламберто Занниер, Раиси Шӯрои доимии Созмон (Швейтсария) Сафир Томас Гремингер ва шоҳзодаи Шоҳигарии Ҳошимии Урдун Ал-Ҳассан бин Талал суханронӣ намуданд.Роҳбари ҳайати Тоҷикистон дар рафти ҷаласаи якуми чорабинии Рӯзҳои амниятии САҲА, ки ба мавзӯи «Нигоҳи амниятӣ доир ба масъалаҳои об» бахшида шуда буд, баромад карда, дар муҳокимаи ин масъала низ иштирок кард. Ширкаткунандагони чорабинии мазкур мавзӯъҳои сиёсӣ, иқтисодӣ, иҷтимоӣ, дигаршавии иқлим, ҳолатҳои фавқулодаи табиӣ, сатҳи баланди ҳамкорӣ дар соҳаи об ва нақши дипломатияи об дар қаламрави кишварҳои САҲА-ро мавриди муҳокима қарор доданд.