Мақомоти назорати молиявии Тоҷикистону Эрон хостори ҳамкорианд
Душанбе, 31.07.2014.(АМИТ «Ховар», Марзия Саидзода).- Палатаи ҳисоби Ҷумҳурии Тоҷикистон дар самти робитаҳои байналмилалии худ тасмим дорад дар оянда бо мақомоти назорати молиявии Ҷумҳурии Исломии Эрон бо имзои Созишнома ҳамкориро тақвият бахшад. Дилмурод Давлатзода-раиси Палатаи ҳисоби Ҷумҳурии Тоҷикистон мегӯяд, ки алҳол Палатаи ҳисоби Ҷумҳурии Тоҷикистон бо Палатаи ҳисоби Русия, Қазоқистон ва Эрон ҳамкории густурда дорад. Мавсуф аз кӯмаку дастгириҳои Палатаи ҳисоби Русия ёдовар гардида, гуфт, ки дар таҳкими ҳамкориҳои мақомоти олии назорати молиявии Тоҷикистону Русия саҳми Сергей Степашин -собиқ раиси Палатаи ҳисоби Русия калон аст. Аз ҷониби Палатаи ҳисоби Русия ҷиҳати баланд бардоштани касбияти кормандони Палатаи ҳисоби Ҷумҳурии Тоҷикистон семинарҳои омӯзишӣ гузаронида шуда, инчунин дар самти ҳуҷҷатгузорӣ ҳам кӯмак ироа гардидааст. Дилмурод Давлатзода афзуд, ки Палатаи ҳисоби Ҷумҳурии Тоҷикистон дар соли 2013 узви комилҳуқуқи ИНТОСАИ /INTOSAI/ — созмони байналмилалии мақомоти олии назорати молиявӣ гардид, ки беш аз 150 кишвари ҷаҳон шомили ин созмони бонуфузанд. Ҳамзамон таъкид гардид, ки бобати тақвияти ҳамкориҳо бо кишварҳои пасошӯравӣ Палатаи ҳисоби Ҷумҳурии Тоҷикистон узви Шӯрои мақомоти олии назорати молиявии кишварҳои аъзои Иттиҳоди Давлатҳои Мустақил /ИДМ/ буда, ҳамкориҳоро дар ин самт бо сохтори олии назорати молиявии Қазоқистон низ густариш медиҳад. Бояд тазаккур дод, ки нимаи аввали моҳи сентябри соли 2013 дар пойтахти Қазоқистон шаҳри Остона ҷаласаи ХIII -уми Шӯрои роҳбарони мақомоти олии назорати молиявии ИДМ баргузор гардид. Дар он Дилмурод Давлатзода -раиси Палатаи ҳисоби Ҷумҳурии Тоҷикистон ба ҳайати Шӯрои роҳбарони мақомоти олии назорати молиявии ИДМ шомил карда шуд.