Муҳокимаи ҳамкориҳои амниятии Тоҷикистону Амрико
Душанбе, 31.07.2014. (АМИТ «Ховар», Мавҷуда Анварӣ). — Маҷмӯи масоили ҳамкориҳои сиёсиву амниятӣ, низомӣ, мудофиа ва таъмини суботи минтақавӣ миёни Тоҷикистону Амрико дар мулоқоти Президенти Ҷумҳурии Тоҷикистон Эмомалӣ Раҳмон ва Фармондеҳи Фармондеҳии Марказии Иёлоти Муттаҳидаи Амрико генерал Ллойд Остин III мавриди таҳлилу муҳокима қарор гирифт. Фармондеҳи амрикоӣ пас аз мулоқот бо Сарвари давлат дар ҳузури намояндагони ВАО аз ҳамкориҳои босамари миёни ду кишвар ёдовар шуда, таъкид намуд, ки дар ин вохӯрӣ соҳаҳои мухталифи ҳамкории Тоҷикистону ИМА, ки сол то сол рушд меёбанд, мавриди баҳсу баррасӣ қарор гирифтаанд. «Пеш аз ҳама мехостам зикр намоям, ки боиси ифтихор аст, ки ман бори дигар ба Ҷумҳурии Тоҷикистон сафар намудам. Тоҷикистон бисёр кишвари дилрабо аст ва мардуми он ниҳоят меҳмонпазиранд. Мо имрӯз бо Ҷаноби Президент як сӯҳбати ниҳоят пурмуҳтавое гузаронидем ва дар доираи он масъалаҳои минтақавиро умуман ва инчунин масъалаҳои васеи вобаста ба амниятро баррасӣ намудем. Ман дар навбати худ барои нақши муассир ва мусоидати фаъоли Тоҷикистон ба тарғиби ҳаёти осоишта дар Афғонистон ва рушди иҷтимоию иқтисодии ин кишвар ба Ҷаноби Президент Эмомалӣ Раҳмон арзи сипос менамоям. Мо хоҳони тавсеаи минбаъдаи ҳамкориҳои ҳарду кишвар дар партави таъмини амният, субот ва сулҳи сартосарӣ дар минтақа мебошем»- иброз дошт Фармондеҳи Фармондеҳии Марказии Иёлоти Муттаҳидаи Амрико генерал Ллойд Остин III.