Мусобиқаи қаҳрамонии Осиё-2015 байни дастаҳои мунтахаби занона

Душанбе, 4.07.2014. (АМИТ «Ховар», Ситораи Боймурод).- Мунтахаби Тоҷикистон таҳти раҳбарии сармураббӣ Сулаймон Бобокалонов дар Норак аз 23-юми июн то 2-юми июли соли равон тамрин карда, ба даври интихобии мусобиқаи қаҳрамонии Осиё-2015 байни дастаҳои мунтахаби занонаи то 16-сола, ки аз 4-ум то 13-уми октябр баргузор мешавад, омодагӣ дид. Ба ин ҷамъомад 27 бозингар — 4 дарвозабон, 9 ҳимоятгар, 10 нимҳимоятгар ва 4 ҳамлагар — даъват шуда буданд.Тавре дар ин бора сомонаи Федератсияи футболи кишвар хабар медиҳад, дар сабқати интихобии қаҳрамонии Осиё-2015 ҳамагӣ 21 даста: 12 -то дар минтақаи Ғарб ва 9-то дар минтақаи Шарқ ширкат мекунанд.Мунтахаби занонаи футболи Тоҷикистон (U-16) бар асоси қуръакашӣ дар гурӯҳи «А» бо дастаҳои Узбакистон, Шри-Ланка, Баҳрайн, Фаластин ва Қирғизистон рақобат мекунад. Мусобиқа аз 4-ум то 13-уми октябри соли равон дар Шри-Ланка баргузор мешавад. Мунтахаби Тоҷикистон нахустин бозиашро 4-уми октябр бо дастаи Фаластин анҷом медиҳад. Баъдан футболбоздухтарони тоҷик 6-уми октябр бо дастаи Баҳрайн, 8-уми октябр бо мунтахаби Узбакистон ва 11-уми октябр бо дастаи Шри-Ланка бозӣ мекунанд. Бозии охирини мунтахаби Тоҷикистон дар марҳалаи интихобӣ 13-уми октябр бо дастаи Қирғизистон баргузор мешавад. Бояд гуфт, ки ғолибони ҳар чаҳор гурӯҳ ба марҳалаи ниҳоии қаҳрамонии Осиё-2015 роҳхат мегиранд. Дастаҳои мунтахаби Ҷопон, Кореяи Шимолӣ, Чин ва Тайланд аз даври интихобӣ озоданд ва ба сабқати ниҳоӣ мустақим роҳ ёфтаанд.