Нақши сиёсати макроиқтисодӣ дар ҳалли мушкилоти камбизоатӣ
Душанбе, 03.07.2014. (АМИТ «Ховар», Фарзона Достонзода). — Рӯнамоии китоби Тоҷикистон дар давраи гузариш: нақши сиёсати макроиқтисодӣ дар ҳалли мушкилоти камбизоатӣ бо забонҳои русӣ ва англисӣ 2 июл дар Душанбе доир гардид. Бояд гуфт, ки ин нахустин нашрия дар бахши макроиқтисодиёт ва ислоҳоти идорасозии молияи давлатӣ буда, навиштаҳои муаллифонро аз вазорату идораҳои гуногуни Тоҷикистон, аз ҷумла Бонки миллӣ, Агентии омор, Парламент, донишгоҳҳо ва Академияи илмҳо дар бар мегирад. Тавре, ки ба АМИТ «Ховар» аз Намояндагии Иттиҳоди Аврупо иттилоъ доданд, китоби мазкур мавзуъҳои нишондиҳандаҳои макроиқтисодӣ ва тамоюлҳои иҷтимоию иқтисодии рушди мамлакат, маҷмӯи моделҳои макроиқтисодии байниҳам алоқаманди дар сохтори давлатии Тоҷикистон татбиқшуда, таҳияи модели эконометрикӣ барои дурнамои даромадҳои давлатӣ, модел ва чораҳои ҳамоҳангсозии сиёсати иқтисодӣ ва пулию қарзӣ дар Тоҷикистон, модели эконометрикӣ барои баҳодиҳии вариантҳои сиёсати макроиқтисодӣ, таҳлили динамикаи рушди бозори меҳнат, инчунин таҳлилҳои амалӣ дар бахши идорасозии молия, ки дар асоси низоми нави иттилоотии Вазорати молияи Ҷумҳурии Тоҷикистон таҳия шудааст, фарогир аст. Муаллифони китоб мушовирони тоҷик ва инчунин муҳаррирони асосӣ проф. А. В. Шкуропат ва профессор Пол Хэа, ки дар ду лоиҳаи ИА-Рушди моделсозии макроиқтисодӣ ва ояндабаинӣ дар Тоҷикистон (ширкати СОФРЕКО онро амалӣ намудааст) ва Дастгирии техникии чораҳо оид ба фаҳмонидани барномаи ислоҳоти бахши идорасозии молияи давлатӣ дар Тоҷикистон (аз ҷониби ширкати Б энд Европа амалӣ гаштааст) иштирок намудаанд.