Ноболиғонро беназорат нагузоред

Душанбе, 7.07.2014. (АМИТ «Ховар», Лайло Тоирӣ).- 6 июли соли равон ронандаи автомашинаи тамғаи БМВ-3181, Обидҷон Бектимиров соли таваллудаш 1990, сокини ноҳияи Рудакӣ, ҳангоми ҳаракат дар роҳи мошингарди деҳаи Сомон ба самти деҳаи Гулпарвари ноҳияи Рудакӣ аз ӯҳдаи идораи воситаи нақлиёт набаромада, пиёдагарди ноболиғ Толибҷон Усмонов соли таваллудаш 2006, сокини ҳамин ноҳияро пахш намудааст. Бино ба иттилои хадамоти матбуоти ВКД, дар натиҷа ноболиғ ҷароҳати вазнини ҷисмонӣ бардошта, дар беморхона ба ҳалокат расидааст.Дар ин рӯз, ҳамчунин ронандаи автомашинаи тамғаи БМВ-520 Олимназар Чориев соли таваллудаш 1967, сокини ноҳияи Ҷалолиддини Румӣ, дар ҳавлии истиқоматиаш ҳангоми ба қафо ҳаракат намудан, набераи ноболиғаш Нодирбек Чориев соли таваллудаш 2012-ро пахш кард. Дар натиҷа ноболиғ ҷароҳати вазнини ҷисмонӣ бардошта, дар ҷойи ҳодиса ба ҳалокат расид.