Пешниҳоди ҳисоботи андоз дар шакли электронӣ

Душанбе, 7.07.2014.(АМИТ «Ховар», Мавҷуда Анварӣ).-Имрӯз дар шаҳри Чкалов семинар -машварат аз ҷониби кормандони Кумитаи андоз дар робита ба пешниҳоди ҳисоботи андоз дар шакли электронӣ гузаронида шуд.Дар семинар-машварат сарварону муҳосибони ташкилоту муассисаҳо, намояндагони корхонаҳои буҷавию ғайрибуҷавӣ, соҳибкорон ва кормандони нозироти андози шаҳр иштирок намуда, доир ба пешниҳоди ҳисоботи андоз дар шакли электронӣ маълумоти муфассал дастрас намуданд.Олимҷон Орифҷонов, намояндаи Кумитаи андоз дар ҷараёни семинар-машварат изҳор дошт, ки пешниҳоди ҳисоботи андоз дар шакли электронӣ шароит фароҳам меоварад, ки андозсупоранда бе ташриф ба мақомоти андоз, аз утоқи кории худ бо истифода аз шабакаи интернет ҳисоботи хешро пешниҳод созад.Аз соли 2011 инҷониб дар Кумитаи андоз барномаи компютерӣ таҳия ва такомул дода шудааст ва андозсупорандагон эъломияи худро дар шакли электронӣ пешниҳод намуда истодаанд.Дар семинар-машварат тавассути таҷҳизоти техникӣ раванди бақайдгирӣ, усули истифодаи дурусти кор ва паҳлӯҳои дигари пешниҳоди эъломия дар шакли электронӣ фаҳмонида дода шуд.Дар ин бора аз Хадамоти матбуоти раиси вилояти Суғд хабар доданд.