Раиси шаҳр ба мудирони бозор мӯҳлат дод

Душанбе, 22.07.2014.(АМИТ “Ховар”, Марзия Саидзода).- Раиси шаҳри Душанбе Маҳмадсаид Убайдуллоев дар ҷаласаи шаҳрдорӣ аз нархи маҳсулоти ғизоӣ дар бозорҳои пойтахт дар даҳаи охири моҳи шарифи Рамазон изҳори нигаронӣ намуда, дар ин самт роҳбарони бозорҳои шаҳрро муваззаф сохт, ки бобати захираю бо нархҳои дастрас дар иди Рамазон пешниҳод намудани маҳсулоти ғизоӣ ба сокинон чораҳои қатъӣ андешанд. Раиси шаҳр бобати ислоҳи вазъ дар ин самт ба Бурҳон Назаров -муовини соҳавияш, Сайфулло Амонов- сардори Раёсати рушди иқтисод ва савдои шаҳри Душанбе, инчунин кулли мудирони бозорҳои шаҳр то 1 сентябри соли равон мӯҳлат дод. Инчунин, М. Убайдуллоев ба масъулини сохторҳои марбута дастур дод, ки ҷиҳати ғанӣ гардонидани хони идонаи шаҳрвандон рӯзҳои 26-27 июл дар тамоми шаҳраку маҳаллаҳо ярмаркаи маҳсулоти кишоварзиро роҳандозӣ намоянд. Ҳамзамон барои аз байн бурдани сохторҳои беасоси миёнарав, ки яке аз омилҳои баланд гардидани нарх дар бозорҳо гардидаанд, қарор шуд, ки фаъолияти тамоми нозирони минтақавӣ, духтурони санитарию байторӣ, ки беш аз 5 сол дар як бозор фаъолият доранд, таҷдиди назар карда шаванд.