Роҳзанон ба даст афтоданд

Душанбе, 21.07.2014. (АМИТ «Ховар», Муқаддас Темурзода).- Аз ҷониби кормандони Шӯъбаи ВКД дар ноҳияи Фирдавсӣ ҳамчун гумонбар дар роҳзанӣ ду нафар сокини 20 -солаи ноҳияи Шаҳритус дастгир гардид.Тавре ки ВКД ҶТ хабар медиҳад, онҳо шаби 17 ба 18-уми июли соли 2014, дар назди Маркази савдои «Садбарг» ба автомашинаи шахсии сокини 22-солаи пойтахт Фирӯз Подшоев, тамғаи «Volkswagen Golf», нишаста, ҳангоми ҳаракат ба тарафи бозори «Саховат», дар назди ошхонаи «Осиё», воқеъ дар кӯчаи Н. Қарабоев бо истифода аз миёнбанди чармӣ ӯро буғӣ мекунанд. Сипас номбурдагон ҳамчунин таҳдиди зӯрӣ намуда, аз ӯ 480 доллари амрикоии пули нақд, 1-адад телефони мобилии тамғаи «Nokia», ки арзишаш 500-сомонӣ мебошад ва автомашинаашро гирифта аз ҷойи ҳодиса ғайб мезананд. Тибқи иттилои сарчашма, дар натиҷаи бурдани корҳои фаврӣ-ҷустуҷӯӣ бо изи гарм Диловар Эшмуродов ва Аҳрор Кенҷаев фавран дастгир гардида, нисбат ба онҳо парвандаи ҷиноӣ оғоз гардида, тафтиш идома дорад.