Шоҳбулутҳои Белҷӣ дар Тоҷикистон нашъу намо меёбанд

Душанбе, 22.07.2014. (АМИТ «Ховар», Муқаддас Темурзода).-Зимни нишасти матбуотие, ки имрӯз дар Агентии хоҷагии ҷангали назди Ҳукумати Ҷумҳурии Тоҷикистон баргузор гардид, Азизулло Исматов роҳбари ин агентӣ ба хабарнигорон маълумот дод, ки дар асоси супориши Ҳукумати Ҷумҳурии Тоҷикистон соли ҷорӣ дар шафати шоҳроҳҳои ҷумҳурӣ барои кабудизоркунӣ аз ҷониби кормандони агентӣ ва ташкилоту муассисаҳои он дар якҷоягӣ бо мақомоти маҳаллии шаҳру ноҳияҳо ба миқдори 22 ҳазор бех ниҳолҳои гуногуни сояафкан ва ороишӣ шинонида шуд. Ҳамчунин дар қароргоҳи Ҳукумати Ҷумҳурии Тоҷикистон мавзеи Сайёди ноҳияи Данғара аз ҷониби кормандони соҳаи ҷангал ба миқдори 53 бех ниҳолҳои гуногун шинонида шуд, ки то кунун дар онҳо 2 маротиба корҳои нигоҳубини агротехникӣ гузаронида шудааст ва ҳолати онҳо мӯътадил мебошанд.Дар ҷараёни нишасти матбуотӣ А. Исматов дар посух ба хабарнигори АМИТ «Ховар» оид ба нашъу намои Шоҳбулутҳои Белҷӣ гуфт, ки Шоҳбулутҳои Белҷӣ ба боду ҳавои Тоҷикистон мутобиқ буда дар айни ҳол хуб нашъу намо ёфта истодаанд.