Суғд: Таъсиси маркази омӯзиши ҳунарҳои миллӣ дар Урметан

Душанбе, 22.07.2014. (АМИТ «Ховар», Ситораи Боймурод).- Бо мақсади иҷрои дастуру супоришҳои раиси вилояти Суғд Абдураҳмон Қодирӣ ҷиҳати тақвият бахшидан ба раванди эҳёи ҳунарҳои миллӣ, аз ҷумла қолинбофии дастӣ ва сӯзанидӯзӣ дар шаҳру ноҳияҳои вилоят як қатор корҳо ба анҷом расонида шуд.Тавре ки дар ин бора хадамоти матбуоти раиси вилояти Суғд хабар додааст, то имрӯз барои омӯзонидани ҳунари қолинбофии дастӣ ва сӯзанидӯзӣ ба занону духтарони хонашин ва ба ин васила ба шуғл фаро гирифтани онҳо дар ҳамаи шаҳру ноҳияҳои вилояти Суғд бо ташаббуси Раёсату шӯъбаҳои Агентии меҳнат ва шуғли аҳолӣ ва дастгирии мақомоти иҷроияи маҳаллии ҳокимияти давлативу соҳибкорон дастгоҳҳо ва маҳсулоти қолинбофиву сӯзанидӯзӣ харидорӣ карда шуда, ба шаҳрвандон омӯзонидани ин ҳунарҳои зебои миллӣ оғоз гардид.Гуфта мешавад, ки ҳафтаи сипаригардида низ дар ҷамоати деҳоти Урметани ноҳияи Айнӣ тариқи роҳхати мақомоти давлатии шуғли аҳолӣ 20 нафар занону духтарони хонашини деҳот ба омӯзиши ҳунари сӯзанидӯзӣ фаро гирифта шуданд.