Судяҳои пойтахт ба кадом камбудиҳо роҳ додаанд?

Душанбе, 3.07.2014. (АМИТ «Ховар», Мавҷуда Анварӣ). — Ҷаласаи васеи Раёсати суди шаҳри Душанбе бо иштироки роҳбарият, судяҳои суди ноҳияҳо ва шаҳри Душанбе 2 июли соли ҷорӣ доир гардид. Дар ҷаласа фаъолияти кори суди шаҳри Душанбе ва ноҳияҳои он дар нимсолаи якуми соли 2014 мавриди баррасӣ қарор дода шуд.Раиси коллегияи судӣ оид ба парвандаҳои ҷиноятии суди шаҳри Душанбе Ф. Додометов дар ин ҷаласа баромад намуда, зикр дошт, ки сифати кори судяҳои судҳои ноҳияҳои шаҳри Душанбе беҳтар гашта, қарорҳои қонуниву асоснок қабул мегараданд. Зикр гардид, ки иҷрои қарорҳои қабулгардида бояд зери назорати доимӣ қарор дода шаванд.Муовини якуми раиси суди шаҳри Душанбе А. Ашӯров гуфт, ки судяҳо барои сари вақт ва босифат баррасӣ намудани парвандаҳои шаҳрвандӣ тамоми чораҳоро андешида истодаанд, то ки ҳуқуқу манфиатҳои шаҳрвандон таъмин гардад. Баррасии судҳои сайёр ва баровардани таъинотҳои хусусӣ бояд бештар гардад.Муовини раиси суди шаҳри Душанбе Ш. Азизов вобаста ба фаъолияти судяҳо оид ба баррасии парвандаҳои оилавӣ зикр намуд, ки ҳоло ҳам камбудиҳо дар фаъолияти баъзе судяҳо ба назар мерасанд ва талаб кард, ки бе асосҳои кофӣ ҳолатҳои бе баррасӣ гузоштани парванда хотима дода шавад.Раиси суди шаҳри Душанбе Ҳ. Шарофов натиҷаи кори ҷаласаро ҷамъбаст намуда, иброз дошт, ки дар маҷмуъ сифати кори судҳои ноҳияҳо ва шаҳри Душанбе беҳтар гаштаааст, вале ҳоло ҳам сари вақт баррасӣ нагардидани парвандаҳо боиси муроҷиати шаҳрвандон мегараданд.