Таҳқиқи нави бунёдӣ дар соҳаи публитсистикаи тоҷик
Душанбе, 21.07.2014 (АМИТ «Ховар» Фарзона Достонзода). — Нашриёти Донишгоҳи Славянии Руссияву Тоҷикистон монографияи нави доктори илмҳои филологӣ, мудири кафедраи таърих, назарияи рӯзноманигорӣ ва ВАО-и электронии ДСРТ Масрур Абдуллоев таҳти унвони «Публитсистикаи тоҷик ва ҳуввияти миллӣ (баъди чоряки XIX -нимаи авали асри XX)» -ро аз чоп баровард. Дар монография пайдоиш ва таҳаввули масъалаи ҳуввияти миллии тоҷик дар чоряки охири асри XIX — нимаи авали асри XX (то соли 1940) дар публитсистикаи тоҷик таҳқиқ шудааст. Муносибати фарқкунандаи муаллиф ба мавзӯъ дар монографияи мазкур дар он аст, ки инъикоси худшиносии миллии тоҷик дар асарҳои баррасигардидаи давраи публитсистӣ (дар мисоли корҳои публитсистии Аҳмади Дониш, Садриддин Айнӣ, Саидризо Ализода, Аббос Алиев , Абдулқодир Муҳиддинов ,Турақул Зеҳнӣ ва дигарон) бо назардошти равандҳои эволютсионии ҳуввияти милли тоҷик ва гузариши он аз як типи таърихӣ ба дигар мебошад.Бояд зикр намуд, ки кори мазкур таҳқиқи нави бунёдӣ дар соҳаи таърихи публитсистикаи тоҷик мебошад. Китоб зери таҳияи умумии аъзокорреспонденти Академияи илмҳои Ҷумҳурии Тоҷикистон Имомов М.С. нашр шудааст. Муҳарири масъули монография доктори илмҳои филологӣ профессор Н.Н.Салихов мебошад.Мақсади асосии монографияи нав ҳамаҷониба таҳқиқ ва таҳлилу инъикоси таърих мебошад. Монография мариди таваҷҷӯҳи муҳаққиқони таърихи публитсистикаи тоҷик ва рӯзноманигорӣ, забоншиносон, файласуфон, таърихчиён, ҳамчунин донишҷӯён ва аспирантони самтҳои гуманитарӣ қарор хоҳад гирифт.