Таҳсили хизматчиёни давлатӣ дар зинаи магистратураи кишварҳои хориҷӣ

Душанбе, 09.07.2014 (АМИТ «Ховар», Манижа Баҳромзода).-Дар ҳамкорӣ бо Маркази ҳамкориҳои байналмилалии Ҷопон ва Барномаи JDS 5 нафар хизматчии давлатӣ барои таҳсил дар зинаи магистратураи донишгоҳҳои Ҷопон барои солҳои таҳсили 2014-2016 интихоб гардиданд. Ин нукта зимни нишасти хабарии Агентии хизмати давлатии назди Президенти кишвар баррасӣ гардид. Гурез Қосимзода–муовини якуми директори Агентии мазкур гуфт ҳамасола 5 нафар хизматчиёни давлатӣ барои таҳсил ба донишгоҳҳои Ҷопон фиристода шуда, имсол 23 нафар хизматчиёни ҷавони Ҷумҳурии Тоҷикистон,ки бо забони англисӣ хуб ҳарф мезананд,аз вазорату идораҳои гуногун барои таҳсил ба магистратураи ҷумҳурии Корея низ тавсия дода шуданд. Файзулло Фақиров-муовини сардори шӯъбаи ташкилӣ,таҳлилӣ ва иттилоотии Агентии хизмати давлатии назди Президенти Ҷумҳурии Тоҷикистон дар робита ба ин гуфт,ки аллакай 15 нафар хизматчиёни давлатии кишвар дар зинаи магистратураи Ҷопон таҳсил намуда баргаштанд ва 3 нафари дигар моҳи сентябр ба ватан бармегарданд.Ба иттилои манбаъ дар назар аст имсол 3 нафар хизматчии давлатӣ аз Вазорати рушди иқтисод ва савдои Ҷумҳурии Тоҷикистон ва 2 нафар аз Вазорати энергетика ва захираҳои обии Ҷумҳурии Тоҷикистон барои таҳсил ба зинаи магистратураи донишгоҳҳои Ҷопон сафарбар гарданд.