Таҷлили Ваҳдати тоҷикон дар Чин

Душанбе, 1.07.2014. (АМИТ «Ховар», Мавҷуда Анварӣ). — 15 нафар афсари Агентии назорати маводи нашъаовар, ки дар кори семинар дар мавзӯи “Мубориза бар зидди сӯйиистеъмоли маводи нашъаовар” дар шаҳри Урумчӣ иштирок доранд, 27 июн Рӯзи Ваҳдати миллиро дар якҷоягӣ бо намояндагони Вазорати амнияти ҷамъиятӣ аз шаҳри Пекин ва роҳбарияти Академияи политсияи ноҳияи мухтори Синтзян-Уйғури Ҷумҳурии Халқии Чин ҷашн гирифтанд. Дар оғози чорабинӣ роҳбари гурӯҳи ҳайати Агентӣ ба ҳозирин дар бораи таърихи Ваҳдати миллӣ дар Ҷумҳурии Тоҷикистон маълумоти муфассал ироа намуда, ёдовар шуд, ки саҳми Президенти Тоҷикистон Эмомалӣ Раҳмон дар муттаҳидсозии нерӯҳои пешоҳанги кишвар, барқарорсозии ҳаёти осоишта, созмон додани заминаи мустаҳкам барои раванди эҷодкунанда дар ҷумҳурӣ хеле калон аст. Ӯ иброз намуд, ки самари Ваҳдати миллӣ аст, ки имрӯз кишвари мо бо мамлакатҳои ҷаҳон, аз ҷумла бо Ҷумҳурии Халқии Чин ҳамкориҳои судмандро ба роҳ мондааст. Ҳамкориҳои Вазорати амнияти ҷамъиятии Чин ва Агентии назорати маводи нашъаовар дар самти мубориза бо муомилоти ғайриқонунии маводи нашъаовар, пешгирии нашъамандӣ, омӯзиш ва такмили ихтисоси кормандон, бо техника ва таҷҳизот таъмин намудани Агентӣ аз ҷумлаи робитаҳои судбахш аст.Айни замон кормандони Агентӣ тахассуси касбии худро дар шаҳри Пекин идома дода истодаанд.