Тадқиқоти сотсиологӣ барои ошкор намудани нашъамандон

Душанбе, 21.07.2014.(АМИТ «Ховар», Мавҷуда Анварӣ).- Бо мақсади дар оянда татбиқ намудани “Стратегияи миллии мубориза бар зидди гардиши ғайриқонунии маводи мухаддир дар Ҷумҳурии Тоҷикистон барои солҳои 2013-2020” аз тарафи Агентии назорати маводи нашъаовари назди Президенти ҶТ дар якҷоягӣ бо Вазорати тандурустӣ ва ҳифзи иҷтимоии аҳолии ҶТ тадқиқоти сотсилогӣ оид ба ошкор намудани сатҳи афзоиши шахсони нашъаманд, таркиби синну солӣ ва вазъи иҷтимоии онҳо ташкил ва гузаронида шуда истодааст.Аз 13 то 20 июн аз ҳисоби кормандони вазоратҳо ва идораҳои салоҳиятдор 4 гурӯҳи корӣ таъсис дода шуд. Аз сабаби он, ки миқдори зиёди нашъамандон дар пойтахт арзи вуҷуд доранд, тадқиқоти сотсиологӣ дар шаҳри Душанбе 13 июн оғоз гардида, 30 сентябри соли 2014 ба итмом мерасад.Бояд зикр намуд, ки тадқиқот аз 4 марҳила иборат буда, дар он дар асоси саволномаи тартибдодашуда кормандони вазорату идораҳои салоҳиятдор, мақомоти ҳокимияти маҳаллӣ, ҳифзи ҳуқуқ, намондагони дин, раисони маҳаллаҳо, шахсони нашъаманд, инчунин аъзои оилаи онҳо райъпурсӣ карда мешаванд.