Татбиқи лоиҳаҳои сохтмон , таҷдид ва навсозии роҳҳои ҷумҳурӣ

Душанбе, 4.07.2014. (АМИТ «Ховар», Зарангези Латиф).- Имрўз дар ҳузури муовини Сарвазири мамлакат Азим Иброҳим дар вазорати нақлиёти ҷумҳурӣ бо иштироки роҳбарияти вазорати нақлиёт ва роҳбарони марказҳои татбиқи лоиҳаҳои сохтмон, таҷдид ва навсозии роҳҳои ҷумҳурӣ ҷаласаи корӣ баргузор гардид.Дар ҷаласа вазъи кунунии сохтмони роҳҳо дар мамлакат, таҷдид ва навсозии онҳо мавриди муҳокима қарор дода шуд. Ҳолати феълии аксар роҳҳои мамлакат, ки бо ҷалби сармояи хориҷӣ ва харҷи зиёди маблағҳои худӣ бунёд гардидаанд ташвишовар арзёбӣ гардид. Аз ҷумла таъкид шуд, ки дар сохтмони роҳи мошингарди Душанбе-Кулма қитъаи Душанб е- Данғара зимни корҳои сохтмонӣ камбудиҳои зиёди корҳои роҳсозию муҳандисӣ сарфи назар карда шуда, шароит ва иқлими маҳал ба инобат гирифта нашудааст.Ин ҳолат дар қитъаи роҳи мазкур боиси дар фурсати кўтоҳ корношоям гардидани роҳҳо гардида харҷҳои иловагиро пеш гузоштааст.Чунин ҳолат дар сохтмони роҳи мошингарди Душанбе-Турсунзода ва дигар роҳҳои аҳамияти байналмилалию маҳалӣ дошта низ ба назар мерасанд.
Муовини сарвазири мамлакат роҳбарияти вазорати нақлиёт ва роҳбарони марказњои татбиқи лоиҳаҳои сохтмон, таҷдид ва навсозии роҳҳои ҷумҳуриро дар ҷаласа барои бартарафсозии камбудиҳои ҷойдошта, вусъат бахшидани корҳои сохтмони роҳҳо, беҳтар гардонидани сифати корҳои лоҳакашию муҳанисӣ ва мувофиқ ба меъёрҳои ҷаҳонӣ иҷро намудани лоиҳаҳои хурду бузурги сармоягузорӣ дар бахши сохтмон, таҷдид ва навсозии роҳҳо вазифадор кард.