Тоҷикистон бо Мозамбику Бангладеш робитаи иқтисодӣ ба роҳ монданист

Душанбе, 30.07.2014.(АМИТ «Ховар», Марзия Саидзода).- Вазорати рушди иқтисод ва савдои Ҷумҳурии Тоҷикистон тасмим дорад дар оянда ҳамкории иқтисодию тиҷоратии Тоҷикистонро бо бархе аз кишварҳои қораи Осиё ва Африқо ба роҳ монда, густариш диҳад. Неъматҷон Буриев-муовини аввали вазири рушди иқтисод ва савдои кишвар имрӯз дар ҷараёни нишасти матбуотӣ ба хабарнигорон гуфт, ки ҷиҳати такмил ва тақвияти заминаҳои шартномавӣ- ҳуқуқии муносибатҳои ҳасанаи Тоҷикистон ва Мозамбик аз ҷониби Вазорат лоиҳаи «Созишнома оид ба ҳамкории иқтисодию тиҷоратӣ ва техникии Ҷумҳурии Тоҷикистон ва Ҷумҳурии Мозамбик» таҳия гардида, ба баррасии Ҳукумати Ҷумҳурии Тоҷикистон ва мувофиқаи Ҷумҳурии Мозамбик ирсол гардидааст. Инчунин ҷиҳати гузаронидани расмиёти дохилидавлатӣ дар мавриди маъқул донистани лоиҳаи «Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Бангладеш оид ба ҳамкориҳои тиҷоратию иқтисодӣ» лоиҳаи қарори марбутаи Ҳукумати Ҷумҳурии Тоҷикистон таҳия гардид. Н. Буриев ҳамзамон тазаккур дод, ки бо мақсади рушди ҳамкориҳои дуҷонибаи Тоҷикистону Чин лоиҳаи «Барномаи ҳамкории стратегӣ байни Ҷумҳурии Тоҷикистон ва Ҷумҳурии Мардумии Чин барои солҳои 2015 -2020» таҳия карда шуд, ки алҳол лоиҳаи мазкур дар баррасии вазорату идораҳои марбутаи кишвар қарор дорад.1