Зиёда аз 88 ҳазор евро барои зарардидагон аз офати табии

Душанбе, 14.07.2014. (АМИТ «Ховар»,Фарзона Достонзаде).- Чиҳати расонидани кӯмак ба беш аз 5000 нафароне, ки аз селобаҳои баъд аз боронҳои сахти аввалҳои моҳи майи соли ҷорӣ зарар диданд, Комиссияи Аврупо 88 871 евроро ҷудо намудааст. Тавре, ки ба АМИТ «Ховар» аз намояндагии Иттиҳоди Аврупо иттилоъ доданд, саридораи Комиссияи Аврупо бо номи ЭКО, ки оид ба кӯмакҳои башардӯстона ва ҳимояи авом кор мекунад, тибқи дархости Федератсияи Байналмилалии Салиби Сурх ва Ҳилоли Аҳмар (ФБСС) барои фонди ҳолатҳои фавқулодаи ин созмон маблағ ҷудо кард. Ҷамъияти Ҳилоли Аҳмари Тоҷикистон маблағи мазкурро гирифта барои зарардидагон сарф хоҳад кард то мардумро бо либосворӣ, кӯрпача, бастачаҳои беҳдоштӣ ва асбобҳои пухтупаз таъмин намояд.