Ҷаласаи омӯзгорон дар Айнӣ

Душанбе, 27.08.2014. (АМИТ «Ховар», Раъно Нусратуллозода).-Дирӯз дар мақомоти иҷроияи ҳокимияти давлатии ноҳияи Айнӣ маҷлиси васеи кормандони соҳаи маорифи ноҳия баргузор гашт. Тибқи иттилои Хадамоти матбуоти раиси вилояти Суғд, дар машварати августии омӯзгорон намояндагон аз Вазорати маориф ва илми Ҷумҳурии Тоҷикистон ва Раёсати маорифи вилоят, инчунин собиқадорони соҳаи маориф иштирок намуданд.
Сараввал намояндагон ва иштирокчиёни маҷлис аз намоиши ҳунарҳои мардумӣ, аз қабили қуроқдӯзӣ, кулолгарӣ ва маҳсулоти нонӣ, ки аз ҷониби хонандагони мактаби таҳсилоти миёнаи умумии № 5, 3, 2 ба маърази тамошо гузошта шуд, дидан карданд.
Дар машварат раиси ноҳия Неъматулло Раҳматуллозода зикр намуд, ки маориф аз соҳаҳои афзалиятнок дар сиёсати пешгирифтаи Ҳукумати ҷумҳурӣ ба ҳисоб меравад.
Дар ҷаласа ҳамчунин мудири шуъбаи маорифи ноҳия Муллоғиёс Шарифов оид ба бурду бохти соҳаи маориф дар давраи ҳисоботӣ ба таври муфассал маълумот дод.