81 % ғалладонагиҳо ҷамъоварӣ шуд

Душанбе, 13.08.2014. (АМИТ «Ховар», Зарангези Латиф).- Ҳафтаи равон дар майдони зиёда 236,6 ҳазор гектар ғалладона даравида шудааст, ки 81 фоизро ташкил медиҳад. Тавре, ки аз вазорати кишоварзии мамлакат хабар доданд, ҳосили умумии ғалладонагиҳо зиёда аз 645,6 ҳазор тонна ва ҳосилнокӣ аз ҳар як гектар 28,4 сентнериро ташкил медиҳад. Майдони 228,5 ҳазор гектар куфта шудааст, инчунин дар мавсими ҷамъоварии ҳосили ғалладонагиҳо дар ҷумҳурӣ 144 адад комбайнҳои ғалладарав ба кор ҷалб карда шудааст.Тибқи маълумотҳои фаврии раёсати растанипарварии вазорати кишоварзии Ҷумҳурии Тоҷикистон имсол дурнамои кишти такрорӣ дар хоҷагиҳои ҷумҳурӣ майдони 74799 гектарро ташкил медиҳад. То аввали ҳафтаи равон дар ҷумҳурӣ дар майдони 69,2 ҳазор гектар кишти такрории зироатҳои кишоварзӣ гузаронида шудааст, ки баробари 92,5 фоизи дурнамо мебошад. Аз ҳисоби кишти умумӣ 29196 гектар ғалладонагӣ, 13865 гектар ҷуворимакка барои дон, 5964 гектар шолӣ, 9367 гектар дигар ғалладонагиҳо, 383 гектар картошка, 6581 гектар сабзавот, 2947 гектар полезиҳо,1554 гектар зироатҳои техникӣ ва 28543 гектарро кишти хӯроки чорво ташкил медиҳад.