Бақияи амонатҳо 14,2 фоиз афзуд

Душанбе, 26.08.2014. (АМИТ «Ховар», Лайло Тоирӣ).-Афзоиши пасандозҳои шахсони ҳуқуқӣ ва воқеӣ аз тариқи ҷалби онҳо аз ҷониби ташкилотҳои қарзии ҷумҳурӣ идома дорад. Бино ба иттилои хадамоти матбуоти Бонки миллии Тоҷикистон, бақияи амонатҳо дар охири моҳи июли соли ҷорӣ 5943,8 млн.сомониро ташкил намуд, ки назар ба ҳамин давраи соли гузашта 14,2 фоиз афзуд. Аз он 33,1 фоиз ё 1966,4 млн. сомонӣ амонатҳо ба шахсони ҳуқуқӣ ва 66,9 фоиз ё 3 977,4 млн. сомонӣ ба шахсони воқеӣ тааллуқ доранд. Амонатҳои номбурда дар қиёс ба ҳамин давраи соли қаблӣ мутаносибан 4,1 ва 19,9 фоиз зиёд шуданд. Мувофиқи маълумотҳои оморӣ дар ҳафт моҳи соли 2014 фоизи миёнавазни амонатҳо бо пули миллӣ 15,20 фоизи солона ва амонатҳо бо асъори хориҷӣ 11,97 фоизи солонаро ташкил намуд, ки мутаносибан ба ҳамин давраи соли рафта 0,3 банди фоизӣ паст ва 0,9 банди фоизӣ баланд шуд.