Баррасии ҷараёни омодагиҳо ба чор ҷашн дар назди Марҳабо Ҷабборӣ

Душанбе, 06.08.2014. (АМИТ «Ховар»).-Имрӯз дар назди муовини Сарвазири Ҷумҳурии Тоҷикистон Марҳабо Ҷабборӣ машварати корӣ доир гардид.Дар машварат масъулини Дастгоҳи иҷроияи Президенти Ҷумҳурии Тоҷикистон, роҳбарияти вазоратҳои фарҳанг, молия, рушди иқтисод ва савдо, Академияи илмҳо, муовинони раиси вилояти Хатлон, шаҳри Кӯлоб ва ректори Донишгоҳи давлатии Кӯлоб ба номи Абӯабдулло Рӯдакӣ ширкат варзиданд.Зимни машварат ҳисоботи аъзои Кумитаи тадорукот ва масъулин оид ба рафти баргузории чорабиниҳои бахшида ба 600-солагии Абдураҳмони Ҷомӣ, 100-солагии Зиёдулло Шаҳидӣ ва ҷараёни амалишавии нақшаи чорабиниҳо ҷиҳати сазовор таҷлил намудани 700-солагии олим ва мутафаккири Шарқ Мир Сайид Алии Ҳамадонӣ ва 70-солагии Донишгоҳи давлатии Кӯлоб ба номи Абӯабдулло Рӯдакӣ шунида шуд.Қайд гардид, ки баргузории чорабиниҳои мазкур барои боз ҳам боло бурдани ҷойгоҳи Ҷумҳурии Тоҷикистон дар арсаи байналмилалӣ мусоидат намуда, ҳамзамон ҷиҳати тарбияи насли наврас дар руҳияи худшиносиву ватандӯстӣ ва ифтихор аз арзишҳои милливу мероси ниёгон нақш хоҳад гузошт.Дар маҷмӯъ, ҷараёни корҳо ва рафти омодагиҳо ба чор ҷашни зикргардида, қаноатманд арзёбӣ гардида, барои вусъати корҳо ба масъулин дастуру супоришҳо дода шуд.