Боздиди ҳайати Русия аз МОИ «Суғд»

Душанбе, 19.08.2014. (АМИТ «Ховар», Зарангези Латиф).- Ҳафтаи сипаришуда ҳайати расмии Федератсияи Русия бо фаъолияти минтақаи озоди иқтисодии «Суғд» шинос шуд.
Дар маҳфили муштарак барномаҳои афзале. ки барои якҷоя бо ҷониби Русия татбиқ намудан таҳия шудаанд, аз ҷумла бунёди маркази логистикии нақлиётӣ ва шохаи роҳи оҳан баррасӣ гардиданд.
Ба иттилои дафтари матбуоти раиси вилоят, роҳбари ширкати «Стандарт капитал»-и Русия Михаил Черенов тарҳи бунёди шабакаи қабул, нигоҳдорӣ ва коркарди маҳсулоти кишоварзиро дар марказҳои логистикии Тоҷикистон рӯнамоӣ кард.
Гуфта мешавад, ки имкони дар ҳудуди МОИ «Суғд» бунёд намудани чунин марказ низ мавриди баррасӣ қарор гирифт. Соҳибкорон ҳамчунин бо фаъолияти муассисаи «Хуҷандсоз», ки тибқи нақша сохтмони маркази логистикӣ бояд дар ҳудуди он оғоз ёбад, шинос гардиданд.