Боздошти Шамшод бо 15 кг афюн

Душанбе, 26.08.2014. (АМИТ «Ховар», Раъно Нусратуллозода).-22 августи соли ҷорӣ ҳангоми гузаронидани чораҳои фаврӣ-ҷустуҷӯӣ мошини тамғаи «Опел-астра», рақами давлатиаш TJ 69-75 таҳти идораи шаҳрванди Ҷумҳурии Тоҷикистон Расулов Шамшод Пирмаҳмадовичи 32-сола, истиқоматкунандаи вилояти Хатлон, ноҳияи Хамадонӣ ҷиҳати интиқоли ғайриқонунии маводи нашъадор боздошт шуд.Тавре ки аз Хадамоти гумруки кишвар иттилоъ доданд, дар натиҷаи азназаргузаронӣ маълум шуд, ки шаҳрванд Расулов Шамшод Пирмаҳмадович дохили болопӯши чархи эҳтиётӣ (запаска)-ро ҳамчун пинҳонгоҳ истифода бурда, дар дохили он 11 бастаи полиэтилениро пинҳон кардааст.Тибқи маълумотномаи ташхиси криминалистӣ маводи гирифташуда ба воситаи нашъадори навъи афюн мансуб буда, вазни холиси он 15 кг 60 граммро ташкил медиҳад.Бо назардошти он, ки дар кирдорҳои Расулов Шамшод Пираҳмадович аломати таркиби ҷиноятии дар моддаи 200 қисми 4 банди «д» Кодекси ҷиноии Ҷумҳурии Тоҷикистон пешбинишуда мавҷуд аст, нисбат ба номбурда парвандаи ҷиноӣ оғоз шуд ва тафтиш идома дорад.