Чкалов: мулоқот бо ҳайати кории “Евро-Азия 2005”

Душанбе, 21.08.2014. (АМИТ «Ховар», Зарангези Латиф).-Зимни мулоқоти намояндагони мақомоти иҷроияи ҳокимияти давлатии шаҳри Чкалов бо ҳайати кории ҶСП “Евро-Азия 2005” зикр гардид, ки Сарвари давлат Эмомалӣ Раҳмон дар Паёми навбатии худ ба Маҷлиси Олии Ҷумҳурии Тоҷикистон зикр намуд, ки миқдори умумии ҷойҳои нави кории муҳайёшуда дар панҷ соли охир 870 ҳазор, аз ҷумла танҳо соли 2013 беш аз 185 ҳазорро ташкил кард, ки ин барои беҳтар гардидани вазъи бозори меҳнат ва сатҳи зиндагии мардум мусоидат намуд.
Ҳамчунин гуфта шуд, ки соли равон дар назар аст 150 корхонаи нави истеҳсолӣ мавриди истифода қарор гирифта, боз 250 ҳазор ҷойи нави корӣ таъсис дода шавад, ки ин иқдоми Роҳбари давлат танҳо ба хотири фароҳам овардани шароити хуби зиндагӣ  барои ҷомеаи Тоҷикистон мебошад.
Ёдрас мешавем, ки чанде пеш чунин як мулоқот дар мактаби санъати шаҳр доир гардид.